OPEN HEAVENSMATALA LE LAGI MO LE ASO SA 28 TESEMA 2025(tusia e Pastor EA Adeboye) Manatu Autu:  E faamagalo uma (He forgives all)Tauloto Tusi Paia: 1 Ioane 1:9 “Ae ‘āfai tatou te fa‘aali a tatou agasala, e fa‘amaoni o ia, ma le amiotonu e fa‘amāgalo ai a tatou agasala, ma fa‘amamā mai ia i tatou i amioletonu uma lava.”‭‭Faitauga - Tusi Paia: Salamo 103:8-13I tausaga ua mavae, na faalogo se tagata lotu Mosalemi i le talalelei ia Iesu Keriso i le taimi o se tasi o matou polokalame ma ua faaolaina ai. Ua matua faatumuina i le olioli ma ua matou fiafia ma ia. E tolu aso mulimuli ane ua sau ia te a’u ma fesili mai, ‘e moni ea e faamagalo e Iesu agasala uma?’ Ona ou tali atu lea, ‘ioe’. Ua tali mai, ‘ae ete lei faalogo i mea uma na ou faia. O le amioleaga na ou faia e matua leaga ma ailoga na te mafaia ona faamagaloina mea uma’. Na ou fesili atu ia te ia, ‘ua e tuuina atu lou ola ia Keriso?’. Ua ia tali mai, ‘Ioe’. Ona ou tali atu lea, ‘faamolemole, alu i lou aiga ma fiafia, ua faamagalo e Iesu agasala uma’. Ua mavae le isi tolu aso ua toe foi mai ma faapea mai, ‘e te lei faalogo i mea uma na ou faia’. Ona ia faamatala mai lea o agasala eseese na ia faia. Na ou fai atu ia te ia o le taimi e tuuina ai e se tagata lona ola ia Keriso, e tuuina atu e le Atua iai latou ni amataga fou’. Na faifai pea lona toe foi mai ia te a’u i ni agasala na ia faia na ia manatu e leaga tele ailoga e mafai e Iesu ona faamagalo seia oo i se tasi aso na ia faapea mai, ‘a mafai e Iesu ona faamagalo le agasala lenei e tasi o le a ou tau atu ia te oe, ou te lē toe popole la. Sa ou manaomia se fatu o se tama e faia ai se vai faataulaitu. Na oti se alii talavou o lou aiga, na ou alu i lona tuugamau i le po, eli i luga ae  tipi ese lona fatu e fai ai a’u vai. E te manatu ea e mafai e Iesu ona faamagalo lena agasala?’ Na ou tatalaina la’u Tusi Paia ma faaali atu ia te ia le 1 Ioane 1:7 “…o le toto fo‘i o Iesu Keriso lona Alo e fa‘amamāina ai i tatou i agasala uma lava.”‭‭ Na ou fesili ia te ia, ‘ o le a le uiga o agasala uma?’. Ua maea sina taimi ma ua ia tali mai, ‘ou te manatu o agasala uma o agasala uma’. Ua ou tali atu, ‘e sao lelei. E le afaina pe fia le tele o agasala na e faia e oo mai i le taimi nei. O le taimi e tuuina atu ai lou ola ia Iesu, e faamagalo e le Atua agasala uma. E leai se agasala e sili atu ona telē e le mafai e le Atua ona faamagalo’. Na iloa lelei e Tavita e leai se gataaga o mea e faamagalo e le Atua, ma sa ia tusia i le Salamo 103:12, e pei ‘ona vāvā mamao o sasa‘e ma sisifo, e fa‘apea lava ‘ona fa‘amamao e ia ‘iā i tatou o a tatou solitulafono. O soo se taimi e ole atu ai Tavita i le Atua e faamagalonia te ia ma faamamaina o ia mai ana agasala, na faia lava e le Atua. E pau le finagalo o le Atua, o so’o se taimi e te faia ai le agasala, ia moni ona e salamō . Le au pele , afai e te salamō moni mai au agasala, e faamaoni o ia ma amiotonu e faamagalo ia te oe (1Ioane 1:9). O le salamō moni pe afai e le toe faia e lea tagata le agasala ina ua maea ona faamagalo o ia e le Atua. O le alofa mutimutivale o le Atua e lē faatuaoia, peitai o lona loto faamagalo e tatau ona fanau mai ai se loto ua suia ia te oe. O le toto o Iesu e faamamaina i tatou mai agasala uma, i le suafa o Iesu, Amene. 

Ver todos los episodios